كيجو يكشف تفاصيل انضمامه للأهلي وكيف بدأت الاتصالات مع مسئولي النادي

تحدث مصطفى كيجو الوافد الجديد للقلعة الحمراء وانضمامه لفريق كرة السلة بالنادي الأهلي في صفقة انتقال حر عقب نهاية تعاقده مع فريق الشمال القطري.

وقال كيجو في تصريحات رسمية: ” شرف كبير ليه أني ألعب للندي الأهلي، مسؤولية كبيرة، جاي على فرقة بطل كسبانة كل حاجه آخر سنتين فطبعا مسؤولية كبيرة عليا وعلى الفرقة كلها اننا نكسب كل حاجة، انت مطالب مع الأهلي بكل بطولة تشارك فيها تاخدها “.

وأضاف كيجو: ” أنا كنت بلعب في قطر من شهر واحد، مع فريق الشمال القطري، رجعت مصر آخر شهر ستة وقابلت كابت خالد العوضي، وكابتن أحمد الجارحي وكابتن طارق الغنام، قابلتلهم كلهم ومكنش فيه أي مشكلة، الموضوع كله بتاع التوقيع، خد حوالي ساعة”.

وتابع كيجو تصريحاته: “الأهلي في آخر تلات سنين مسيطر على كل البطولات، بياخد تقريبا كل حاجة، منظومة كبيرة ناجحة بكل المقاييس، من مدرب لجهاز إداري، لجهاز فني لجهاز طبي، أنا حبيت أكون موجود وسط المنظومة دي وسط ناس أعرفها تقريبا كلهم زمايلي وصحابي من زمان، فحبيت أكون موجود ضمن المنظومة الناجحة دي”.

وعن اسم الشهر كيجو فأكد لاعب الأهلي: “اسم كيجو مرتبط بيه من وأنا صغير، كنت في مهرجان تحت 12 سنة، وجه مدرب كان شغال في براعم نادي الأهلي، كان بيتفرج على مهرجان، وجالي بعد ما خلصت عجبه لعبي واتفرج عليها كويس، وقال لي أنا هطلع اسم عليك كيجو كان فيه لعيب، زمان اسمه كده بلعب في النادي الأهلي”.

واختتم كيجو تصريحاته برسالة إلى جماهير الأهلي: ” جمهور نادي الأهلي، منتظر دعمكم، موسم طويل مليان بالبطولات، إن شاء الله نقدر نحققها ونكسبها كلها،  كلها، خليكوا ورانا ومعانا إن شاء الله بإذن الله نقدر نكسب كل حاجة، وإن شاء الله أقدر أساهم في تحقيق كل البطولات وأسعدكم”.